இரும்பொறை

சொல் பொருள்

(பெ) ஒரு சேர அரச மரபு

சொல் பொருள் விளக்கம்

ஒரு சேர அரச மரபு

மொழிபெயர்ப்புகள்

ஆங்கிலம்

A Chera kingdom lineage

தமிழ் இலக்கியங்களில் பயன்பாடு:

பல் வேல் இரும்பொறை நின் கோல் செம்மையின்
நாளின் நாளின் நாடு தொழுது ஏத்த
உயர்நிலை உலகத்து உயர்ந்தோர் பரவ – பதி 89/9-11

பலவாகிய வேற்படையையுடைய இரும்பொறையே, நினது அரசியல்முறை செம்மையாக நடத்தலால்
நாடோறும் நாட்டவரெல்லாம் நின்னைத் தொழுது பரவுவதாலும்
உயர்ந்த நிலைமையினையுடைத்தாகிய தேவருலக வாழ்வுக்குரிய ஒழுக்கத்தால் உயர்ந்த சான்றோர் பரவி
வாழ்த்துதலாலும்
– இவன் இளஞ்சேரல் இறும்பொறை என்பான்.

நின் பாடிய அலங்கு செந்நா
பிறர் இசை நுவலாமை
ஓம்பாது ஈயும் ஆற்றல் எம் கோ
மாந்தரஞ்சேரல் இரும்பொறை ஓம்பிய நாடே
புத்தேளுலகத்து – புறம் 22/31-35

நின்னைப்பாடிய விளங்கிய செவ்விய நா
பிறருடைய புகழைச் சொல்லாமல்
பாதுகாவாது கொடுக்கும் வலியையுடைய எம் கோவே!
மாந்தரஞ்சேரல் இரும்பொறை பாதுகாத்த நாடு
தேவருலகத்தை ஒக்கும்
– இவன் சேரமான் யானைகண் சேய் மாந்தரஞ் சேரல் இரும்பொறை

சங்க இலக்கியங்களில் பதிற்றுப்பத்து என்னும் நூல் சேர மன்னர்களைப் பற்றியது. இதிற்கண்ட சேர மன்னர்களை
உதியஞ்சேரல் , அந்துவஞ்சேரல் இரும்பொறை என்ற இரண்டு மரபினராகப் பிரிப்பர் வரலாற்று உரையாசிரியர்
ஔவை.சு.துரைசாமி அவர்கள்.
சங்க கால அரசர்களில் இரும்பொறை என்னும் பெயருடன் 7 அரசர்கள் காணப்படுகின்றனர்.

1. பெருஞ்சேரல் இரும்பொறை – பதிற்றுப்பத்தில் 8-ஆம் பத்துத் தலைவன் – இவனைப் பாடிய புலவர் அரிசில் கிழார

2. இளஞ்சேரல் இரும்பொறை – பதிற்றுப்பத்தில் 9-ஆம் பத்துத் தலைவன்
– இவனைப் பாடிய புலவர் பெருங்குன்றூர் கிழார்

3. குட்டுவன் இரும்பொறை – 9-ஆம் பத்துத் தலைவன் இளஞ்சேரல் இரும்பொறையின் தந்தை
– இவனைப் பாடிய புலவர் பெருங்குன்றூர் கிழார்

4. அந்துவஞ்சேரல் இரும்பொறை – இவனைப் பாடிய புலவர் உறையூர் ஏணிச்சேரி முட மோசியார்

5. கருவூர் ஏறிய ஒள்வாள் கோப்பெருஞ்சேரல் இரும்பொறை – இவனைப் பாடிய புலவர் நரி வெரூஉத் தலையார்

6. குடக்கோச் சேரல் இரும்பொறை – இவனைப் பாடிய புலவர் பெருங்குன்றூர் கிழார்

7. சேரமான் யானைகண் சேய் மாந்தரஞ் சேரல் இரும்பொறை
– இவனைப் பாடிய புலவர் குறுங்கோழியூர் கிழார் & கூடலூர் கிழார்

குறிப்பு

இது சங்க இலக்கியங்களில் இடம்பெற்றுள்ளது

நன்றி

இந்த வலைத்தளம் பற்றிய உங்கள் எண்ணங்களைத் ⭐️⭐️⭐️⭐️⭐️ தயவுசெய்து பதிவு செய்யுங்கள். ஆக்கபூர்வமான உங்கள் கருத்துக்களும் விமர்சனங்களும் இத்தமிழ் வலைத்தளத்தை மேலும் மெருகூட்ட உதவியாக இருக்கும்.

நன்றி.

அன்புடன்

சொலல்வல்லன்