Skip to content

சொல் பொருள்

ஊடு நீந்தியும் ஒரமாக நடந்தும் செல்லும் வழிகளாயிருந்தமையின், வழி ‘ஆறு’ எனப் பட்டது.

1 (வி) 1. சூடுதணி, 2. அமைதியுடன் இரு

2. (பெ) 1. வழி, பாதை, 2. எண் ஆறு, 3. நதி, 4. வழி, உபாயம்,  5. விதம்

சொல் பொருள் விளக்கம்

(1) நிலமெங்கும் ஒரே சோலையாயிருந்த காலத்தில் இடையிடை யோடும் ஆறுகளே, ஊடு நீந்தியும் ஒரமாக நடந்தும் செல்லும் வழிகளாயிருந்தமையின், வழி ‘ஆறு’ எனப் பட்டது. (சொல். கட். 18)

(2) நதி, வழி. இது முதனிலை நீண்ட தொழிலாகு பெயர். நதியானது தரையை அறுத்துக்கொண்டும் காடு முதலா யினவற்றை ஊடறுத்துக் கொண்டும் செல்லுதலின் இப்பெயர்த்து ஆயிற்று. கல்லுங் கரடுமா யிருந்த நிலத்தை வெட்டியறுத்துத் திருத்தி மக்கள் நடப்பதற்கு ஏற்றதாக்குதலின் வழியாயிற்று. (தமிழ் விய. 56)

சொற்பொருள் நுண்மை விளக்கம் (ஆன்றவிந்தடங்கிய சான்றோர்).

(3) வழி ; பலர் நடந்து நடந்து அறுபட்டுப் பண்பட்ட வழி. (திருக்குறள் விரிவுரை. 413.)

(4) நீர் நிறைந்து மண்ணை அறுத்து ஓடுவதைக் கண்டு ஆறு எனப் பெயர் வைத்தது எளியது; நிலத்தில் அறுத்தால் போல் அமைந்த பாதையைக் கண்டு வழி எனப் பெயர் வைத்ததும் எளிதே. ஆயின் ஒருவன் வாழும் வாழ்க்கையின் போக்கை உணர்ந்து அதனை (நல்லவழி என்னும் பொருளில்) நல்ல ஆறு என்று வழங்குமிடத்தில் அருமை புலனாகின்றது.
(மு. வ. மொழிவரலாறு. 92.)

மொழிபெயர்ப்புகள்

ஆங்கிலம்

get cold, be calm, way, path, number six, river, means, device, manner, mode

தமிழ் இலக்கியங்களில் பயன்பாடு:

வெந்து ஆறு பொன்னின் அந்தி பூப்ப – அகம் 71/6

உலையில் காய்ந்து சூடுதணியும் பொன்னின் நிறம்போல செக்கர் வானம் பூத்து நிற்க

நம் உணர்ந்து ஆறிய கொள்கை
அன்னை முன்னர் யாம் என் இதற்படலே – அகம் 95/14,15

நமது களவொழுக்கத்தினை உணர்ந்துவைத்து, அமைதியுற்றிருக்கும் கொள்கையினையுடைய
நம் அன்னை முன் யாம் இக் களவொழுக்கத்திற்பட்டு ஒழுகல் எங்ஙனம் இயலும்?

ஆறிய கற்பின் அடங்கிய சாயல் – பதி 16/10

சீற்றமடையாது தணிந்தொழுகும் அறக் கற்பும், அடக்கம் பொருந்திய மென்மையும்

ஊறு நிரம்பிய ஆறு அவர் முந்துற – மலை 284

இடையூறு நிரம்பிய வழியில் அவர் முந்திச்செல்ல

ஆறு என ஏழு என எட்டு என தொண்டு என – பரி 3/79

ஆறு என்று, ஏழு என்று, எட்டு என்று, ஒன்பது என்று

ஆறு கிடந்து அன்ன அகல் நெடும் தெருவில் – நெடு 30

ஆறு கிடந்ததைப் போல அகன்ற நெடிய தெருவில்

அறிவுடையோன் ஆறு அரசும் செல்லும் – புறம் 183/7

அறிவுள்ளவர் சொல்லும் வழியில் அரசும் செல்லும்

தணியும் ஆறு இது என உரைத்தல் ஒன்றோ – நற் 244/7

தணியும் விதம் இது எனச் சொல்லுதல் ஒன்றோ?

குறிப்பு

இது சங்க இலக்கியங்களில் இடம்பெற்றுள்ளது

நன்றி

இந்த வலைத்தளம் பற்றிய உங்கள் எண்ணங்களைத் ⭐️⭐️⭐️⭐️⭐️ தயவுசெய்து பதிவு செய்யுங்கள். ஆக்கபூர்வமான உங்கள் கருத்துக்களும் விமர்சனங்களும் இத்தமிழ் வலைத்தளத்தை மேலும் மெருகூட்ட உதவியாக இருக்கும்.

நன்றி.

அன்புடன்

சொலல்வல்லன்

Leave a Reply

Your email address will not be published. Required fields are marked *